Facebook-da tələbələr "Dərsə Getmirəm" dedi!

Aksiyanın fotosu: www.facebook.com

27 Fevral-Azərbaycan tələbələrinin boykot günüdür. Boykot Facebookda “event” (tədbir) şəklində təşkil olunub. Facebookda bu tədbir fevral ayının 17-də yaradılıb. Təşkilatçılar həmin gün tələbələri dərsə getməməyə çağırıb. Məqsəd Azərbaycanın təhsil sistemindəki nöqsanları ictimaiyyətə çatdırmaq və buna etiraz etməkdir. Təşkilatçılar Facebookda özlerini Su Münzevi, Saygin Rustam və Dec Cal kimi təqdim edən üç nəfərdir. Onlar hesab edirlər ki, Azərbaycanda təhsildə tətbiq olunan Boloniya sistemi özünü doğrultmur. Və düşünürlər ki, buna qarşı dinc etiraz forması daha düzgündür. Bununla yanaşı təhsil müəssələrindəki haqsızlıq, rüşvətxorluq və.s. məsələlər də etiraza səbəb kimi göstərilir. Facebook səhifəsində olan son göstəricilərə görə tədbirə 29.559 nəfər dəvət olunub. Və bunlardan yalnız 3.322 adam iştirak edəcəyini təsdiqləyib. Tədbiri təşkil edənlərdən biri Saygın Rüstəm boykot barədə:

Aksiyanın Facebook səhifə görüntüsü

“Dostluğumuzda maksimum 200 nəfər adam olmasına rəğmən, bir neçə saat ərzində iştirakını təsdiqləyənlərin sayı mini keçmişdi. Bu onu göstərir ki, tədbirə maraq böyükdür. Düşündük ki, qarşımızda on gün var, bu müddət aksiyanı yaymağa yetər. Dərsə getməyən tələbəyə kim nə deyə bilər?! Üstəgəl hər kəs sözünü bir deyirsə.”

Amma təşkilatçı deyir ki, bir-neçə gündən sonra onların əleyhlərinə kampaniya başladı: 

“Əvvəlcə Təhsil Nazirliyi, sonra YAP partiyasının bir-iki “kuklası” media vasitəsiylə adımıza yamaq qoydu. Bundan əlavə, görün bizim bu boykot nə qədər vahiməli görünübsə yuxarlardan universitet dekanlarına əmr gəlib ki, uşaqları sıxışdırın. Tələbələri gəlməyəcəkləri təqdirdə cəzalandırılacaqları deyilmişdi.”

Aksiya ilə bağlı fərqli düşünən tələbələr də var. Müzakirələrdən belə məlum olur ki, aksiyaya bilib qoşulmayanlar öz universitetlərindən razıdırlar, ya da bu aksiyanı faydasız hesab edirlər.

Bütün təzyiqlərə rəğmən, təşkilatçılar hesab edir ki, aksiya baş tutub. Tələbələrə təzyiq olacağı təqdirdə boykotun müddətsiz davam edəcəyini deyirlər.

Aksiyanın tələbləri:

- Təhsildə rüşvətə köklü və birdəfəlik son qoyulsun;

- Cavan kadrlar müəllim kimi işə cəlb olunsun;

- Tələbələrin təkcə nəzəri deyil, eyni zamanda real və effektiv praktiki biliklərə yiyələnməsinə şərait yaradılsın;

- Tələbələrin işlə təmin olunmasına dair effektiv universitet daxili mərkəzlər istifadəyə verilsin;

- Dövlət sifarişli qəbul yerlərinin azalması tendensiyası dayandırılsın, təhsil haqları maksimum azaldılsın; (Bir halda ki, iqtisadi inkişafdan danışırsınız)

- Nisbətən ağırlıqlı dərslər ilk kursların proqramına daxil edilsin. (Tələbəni kəsməyə deyil, tələbəyə təhsil verməyə istiqamətlənmiş bir sistem istəyirik)”

Bloq postu hazırladı:

Səmra Sədrəddinli
Aysel Qənbərova
Məltəm Talıbzadə
Toğrul Məmmədli
Nigar Hüseynova
Cəmil Rizvanov
Kənan Sadıqov